А.Эшмонов (Нақшбандий):

Ўзим дединг...

Ўзим дединг, ўзбегим, ўзлигингни йўқотдинг,
Ўзим дединг, ўзбегим, саратонда совқотдинг,
Ўзим дединг, ўзбегим, қаҳратонда мим қотдинг,
Ўзим дединг, ўзбегим, ғурбат, иллатга ботдинг,
Ўзим дединг, ўзбегим, элу-юртим титратдинг,
Ўзим дединг, ўзбегим, ўғил қизларинг отдинг,
Ўзим дединг, ўзбегим, ўз бошинг еб тугатдинг,
Ўзим дединг, ўзбегим, ўзинг ўзингни сотдинг,
Ўзим дединг, ўзбегим, кўксим ўзра ўқ отдинг,
Ўзим дединг, ўзбегим, кўзимга тупроқ тортдинг,
Ўзим дединг, ўзбегим, ўтганларим уйғотдинг,
Ўзим дединг, ўзбегим, ахлоқ, устун қулатдинг,
Ўзим дединг, ўзбегим, Даусийнида йиғлатдинг…

 27.04.2009

 

Мен етим эмас эдим!

Азизларим, бу бевафо дунёда биз фарзандлар Отажонларимиз ва Онажонларимизнинг буюк хизматлари эвазига лойиқ хизмат эта олмадик. Бешикларимиз бошида бир тунлик, бедор кечаларининг ҳам хизматин қайтара олмадик.
Мурғак, бир парча этдан авайлаб, асраб , ўзлари емасдан - едириб, киймасдан - кийдириб, таълим - тарбия этиб, вояга етказганликларининг ҳам қадр - қийматига арзигулик хизмат эта олмадик!
Йиллар ўтиб бизлар ҳам ота , она бўлдик, эндигина Отажонларимиз, Онажонларимизнинг буюк хизматларининг нақадар бебаҳо эканлигини англай бошладик десам хато бўлмасдир!

Қуйидаги машқлар ватандан йироқда, 1983 йилнинг 17-20 декабрида битилган. Орадан йиллар утишига қарамасдан хотирамда сақланиб келмоқда. Негаким ушбу машқлар битилган замон мен етим эмас эдим.

Ҳаёт-мамотин фидокорлик ва беқиёс матонат ила фарзандларига бахшида этган Отажонларимиз, Онажонларимиз хотирасига бағишлайман!

ОТАЖОН

Ахир сиз эдингиз, азиз отажон!
Қўлимдан ушлабон илк бора мени
Севиниб тета-поя қилдирган бир он,
Той-той дея бўлган минг дармон.

Ахир сиз эдингиз, азиз отажон!
Шошиб суринганим кўриб ногоҳон
Малакдек таянчу, ҳам бўлган қурбон
Қучиб кўкси узра койиган бир он.

Ахир сиз эдингиз, азиз отажон!
Менинг ғалабамга қувонган ҳар он.
Ахир сиз эдингиз, азиз отажон,
Мағлуб булгандаса чеккан оҳ,фиғон.

Ахир сиз эдингиз, азиз отажон!
Сафарга мен отланган замон,
Ғурур ила зимдан боқибон
Омад тилаб қолган бир жаҳон.

ОНАЖОН

Баъзан шўхлик қилиб ортиқча
Қалбингизга солиб ғулғула,
Кечалар оромингиз бузганим учун
Тиз чўкиб минг бора сўрайман узр!

Баъзан бахт қидириб, отланиб йўлга
Шоҳсупада кўз ёшила сизни қолдириб,
Узоқ хат хабарсиз қўйганим учун
Тиз чўкиб минг бора сўрайман узр!

Баъзан дийдоримни соғиниб, қумсаб
Дилингиз чекканда нолаю фиғон,
Мен сўқир юрагим сезмагани чун
Тиз чўкиб минг бора сўрайман узр!

Баъзан юрагингиз тўлиб ўкинчга
Фарзандим дея, ёш тўкканингиз чун,
Ҳамда оғирингиз қилмайин енгил
Бемавруд белингиз букканим учун,
Тиз чўкиб минг бора сўрайман узр!

(17-20) .12. 1983/(17-18). 04. 2009 йил.

 

Ағёр ила қолгайман!

Сендек висол кўргандан, ватангадо қолгайман,
Сендек йўлдош бўлгандан, ағёр ила қолгайман.
Сендек оташ бўлгандан, аччиқ тутун бўлгайман,
Сендек арслон бўлгандан, содиқ бир сак бўлгайман.

Сендек ватан бўлгандан, чўлда фақир ўлгайман,
Сендек ўзбек бўлгандан, сўзсиз забон бўлгайман.
Сендек воиз бўлгандан, сўқир дарвиш ўлгайман,
Сендек миллат бўлгандан, номсиз элат бўлгайман.

Сендек тавфиқ бўлгандан, Даус кофир қолгайман,
Сендек ўзбек бўлгандан, Даус кофир бўлгайман.
Сендек эркин бўлгандан, маҳкум сангсор ўлгайман,
Сендек маъшал бўлгандан, зулмат афзал кургайман.

Сендек тақсир бўлгандан, мискин умр сургайман,
Сендек чаман кургандан, чангалзорда юргайман.
Сендек шариф бўлгандан, ғарибликда ўлгайман,
Сендек туғилгандан дунёга, йўргагимда ўлгайман.

18.04.2009

Қочқинлар
Қочқинлар,кочқинлар ўзлигидин қочганлар.
Қочқинлар,кочқинлар бўзлигидан қочганлар.
Қочқинлар,кочқинлар хўрлигидан қочганлар.
Қочқинлар,кочқинлар кўрлигидан қочганлар.
Қочқинлар,кочқинлар шўрлигидан қочганлар.
Қочқинлар,кочқинлар ғўрлигидан қочганлар.
Қочқинлар,кочқинлар ғaрлигидан қочганлар.
Қочқинлар,кочқинлар зўрлигидан қочганлар.
Ғурбат ила ҳижратнинг қомусини очганлар…

02.03. 2009

А.У. Эшманов(Нақшбандий)нинг ижоди билан тўлароқ танишиш учун ушбу адресга мурожаат қилишни тавсия қиламиз: http://ciasf.blogspot.com/